കൊച്ചി: സെക്രട്ടേറിയറ്റ് നിയമവകുപ്പിലെ ലീഗൽ അസിസ്റ്റന്റ് ഗ്രേഡ്–II തസ്തികയിലേക്കുള്ള ബൈ ട്രാൻസ്ഫർ നിയമനത്തിന് എഴുത്തുപരീക്ഷയിൽ കുറഞ്ഞത് 40 ശതമാനം മാർക്ക് വേണമെന്ന വ്യവസ്ഥ ശരിവച്ച് കേരള ഹൈക്കോടതി. നിയമകാര്യങ്ങളിൽ മതിയായ അറിവും പ്രാപ്തിയും ആവശ്യമായ ഉത്തരവാദിത്വമുള്ള തസ്തികയാണിതെന്നും യോഗ്യരായ ഉദ്യോഗാർഥികളുടെ നിയമനം ഉറപ്പാക്കേണ്ടതുണ്ടെന്നും കോടതി വ്യക്തമാക്കി.
കട്ട് ഓഫ് വ്യവസ്ഥ ചോദ്യംചെയ്ത് സെക്രട്ടേറിയറ്റ് സബോർഡിനേറ്റ് സർവീസിലെ ജീവനക്കാർ നൽകിയ ഹർജി ജസ്റ്റിസുമാരായ അനിൽ കെ. നരേന്ദ്രൻ, മുരളീകൃഷ്ണ എസ്. എന്നിവരടങ്ങിയ ഡിവിഷൻ ബെഞ്ച് തള്ളി. കേരള അഡ്മിനിസ്ട്രേറ്റീവ് ട്രിബ്യൂണലിന്റെ ഉത്തരവിൽ ഇടപെടാൻ സാഹചര്യമില്ലെന്ന് വ്യക്തമാക്കിയാണ് നവംബർ അഞ്ചിലെ വിധി.
2020 ഡിസംബർ 31-ന് പി.എസ്.സി. പുറപ്പെടുവിച്ച വിജ്ഞാപനത്തിലെ വ്യവസ്ഥയാണ് ഹർജിക്കാർ ചോദ്യംചെയ്തത്. സ്പെഷ്യൽ റൂളുകളിൽ കുറഞ്ഞ യോഗ്യതാമാർക്ക് നിശ്ചയിച്ചിട്ടില്ലാത്തതിനാൽ സർക്കാർ ഉത്തരവിലൂടെ അത്തരമൊരു നിബന്ധന ഏർപ്പെടുത്താനാകില്ലെന്നായിരുന്നു പ്രധാന വാദം. മുൻ തിരഞ്ഞെടുപ്പിൽ കട്ട് ഓഫ് ഉണ്ടായിരുന്നില്ലെന്നും യോഗ്യതയുള്ളവരെ മാർക്കിന്റെ അടിസ്ഥാനത്തിലുള്ള ക്രമത്തിൽ പട്ടികയിൽ ഉൾപ്പെടുത്തണമെന്നും അവർ ആവശ്യപ്പെട്ടു.
എന്നാൽ, ചട്ടങ്ങൾ മൗനം പാലിക്കുന്ന വിഷയങ്ങളിൽ അവയ്ക്കു വിരുദ്ധമാകാത്ത ഭരണനിർദേശങ്ങളിലൂടെ വിടവ് നികത്താമെന്ന് കോടതി വ്യക്തമാക്കി. കുറഞ്ഞ യോഗ്യതാമാർക്ക് നിശ്ചയിച്ച സർക്കാർ ഉത്തരവുകൾ നിലവിലുള്ള ചട്ടങ്ങൾക്ക് അനുബന്ധമായാണ് പ്രവർത്തിക്കുന്നതെന്നും അവ ചട്ടങ്ങളെ ഭേദഗതി ചെയ്യുന്നതായി കണക്കാക്കാനാകില്ലെന്നും ട്രിബ്യൂണൽ കണ്ടെത്തിയിരുന്നു. ഈ നിഗമനത്തിൽ ഹൈക്കോടതി ഇടപെട്ടില്ല.
തിരഞ്ഞെടുപ്പ് നടപടികൾ ആരംഭിക്കുന്നതിനുമുമ്പുതന്നെ കുറഞ്ഞ മാർക്ക് സംബന്ധിച്ച വ്യവസ്ഥ വിജ്ഞാപനത്തിൽ ഉൾപ്പെടുത്തിയിരുന്നതും കോടതി പരിഗണിച്ചു. അപേക്ഷ നൽകുന്നതിനു മുമ്പേ ഉദ്യോഗാർഥികൾക്ക് നിബന്ധന അറിയാമായിരുന്നു. എതിർപ്പില്ലാതെ പരീക്ഷയെഴുതിയശേഷം ഉത്തരസൂചിക പ്രസിദ്ധീകരിക്കുകയും തിരഞ്ഞെടുപ്പിലെ സാധ്യതകൾ വ്യക്തമാകുകയും ചെയ്ത ഘട്ടത്തിലാണ് ഹർജിക്കാർ ട്രിബ്യൂണലിനെ സമീപിച്ചതെന്നും വിധിയിൽ ചൂണ്ടിക്കാട്ടി.
നിയമവകുപ്പിലെ ജോലിയുടെ നിലവാരം സംരക്ഷിക്കുന്നതിന് ഉദ്യോഗാർഥികളുടെ നിയമപരിജ്ഞാനം ഉറപ്പാക്കേണ്ടതുണ്ടെന്ന് കോടതി നിരീക്ഷിച്ചു. ബൈ ട്രാൻസ്ഫർ വിഭാഗത്തിൽ വളരെ കുറഞ്ഞ മാർക്ക് ലഭിച്ചവർക്ക് നിയമനം ലഭിക്കുമ്പോൾ നേരിട്ടുള്ള നിയമനത്തിൽ ഉയർന്ന മാർക്ക് നേടിയവർക്കുപോലും അവസരം ലഭിക്കാത്ത സാഹചര്യം സർക്കാർ കട്ട് ഓഫ് ഏർപ്പെടുത്തുന്നതിന് കാരണമായതായും കോടതി രേഖപ്പെടുത്തി.
40 ശതമാനം യോഗ്യതാമാർക്ക് കാരണം ചുരുക്കപ്പട്ടികയിലെ ഉദ്യോഗാർഥികളുടെ എണ്ണം കുറഞ്ഞുവെന്നത് മാത്രം വ്യവസ്ഥ റദ്ദാക്കാനുള്ള കാരണമല്ലെന്നും കോടതി വ്യക്തമാക്കി. പൊതുസർവീസിലേക്കുള്ള തിരഞ്ഞെടുപ്പിന്റെ ലക്ഷ്യം തസ്തികയ്ക്ക് ഏറ്റവും അനുയോജ്യരായവരെ കണ്ടെത്തുകയാണെന്നും ബെഞ്ച് ഓർമിപ്പിച്ചു.

കേസ്: സജീന യു. വേഴ്സസ് സ്റ്റേറ്റ് ഓഫ് കേരള; ഒ.പി.(കെ.എ.ടി.) നമ്പർ 569/2023. വിധി: 2026 നവംബർ 5.